Јавор

Јаворот е шумско дрво што може да достигне висина до 35 метри. Распространет е во средна, западна и јужна Европа, Кавказ и северниот дел на Мала Азија, најчесто во планински подрачја.

Крошната му е широко заоблена. Стеблото може да достигне дебелина поголема од 1 метар, обично е кратко и покриено со црвенкасто-кафеава кора што се лупи во плочки.

Младите гранчиња најчесто се маслинесто-кафеави, со бројни светли лентицели. Пупките се релативно крупни, светлозелени и покриени со заоблени лушпи.

Листовите се долги и широки 8–16 cm, петоделни, темнозелени од горната страна и нешто посветли од долната.

Листовите имаат заоблено-триаголни лобуси со крупно, но прилично рамномерно назабување. Лисната дршка е зелена, понекогаш црвенкаста, и може да биде долга колку лисната плочка или подолга.

Цветовите се жолтеникаво-зелени, собрани во кратки висечки метлички. Цвета околу десет дена по разлистувањето, во мај.

Плодовите се двојни крилести семки, поставени најчесто под прав агол.

Горскиот јавор е карактеристичен за буковите и мешаните шуми, надвор од поплавни подрачја, и најмногу му одговараат минерално богати, умерено влажни, растресити и хумусни почви.